እሑድ ኅዳር 30 ቀን 2016 ዓ.ም. ወንድም ፍቃደ ሥላሴ (ፍቃዱ) ተስፋዬ እና ወንድም ሉቃስ (ብርሃኑ) ቡናሮ በአዲስ አበባ ቅ. ዮሴፍ ገዳም ዘሲታውያን የመጨረሻ የምንኩስና መሐላቸውን አድርገዋል። ወንድም ፍቃደ ሥላሴ የመንዲዳ መድኃኔዓለም ቁምስና እንዲሁም ወንድም ሉቃስ የዳውሮ ቅ. ፍልሠታ ለማርያም ቁምስና ፍሬዎች ናቸው። ሁለቱ ወንድሞች በአሁኑ ሰዓት የነገረ መለኮት የመጨረሻ ዓመት ተማሪዎች ሲሆኑ፤ ከእነርሱ ጋር በጠቅላላው ዘጠኝ በሕንጸት ላይ የሚገኙ የዓቢይ ዘርአ ምንኩስና የማኅበሩ ተማሪዎች በአዲስ አበባ ቅ. ዮሴፍ ገዳም ይገኛሉ።

በኢትዮጵያ የገዳመ ሲታውያን ኃላፊ በሆኑት በአባ ዳንኤል ጌታቸው በተመራው መሥዋዕተ ቅዳሴ ከሲታውያን አባቶች ጋር ከላዛሪስት፣ ከካፑቺን እንዲሁም ከተለያዩ ሀገረ ስብከቶች ካህናት ተሳትፈዋል። በነበረው የስብከት ጊዜ አባ ዳንኤል ሰው ለአምላክ ሊሰጠው የሚችለው ትልቁ የፍቅር መገለጫ ራስን መስጠት መሆኑን ገልጸው፣ በወንጌል ክርስቶስ ያወደሳት ድኻዋ መበለትም በሙዳየ ምጽዋት ውስጥ ለአምላክ ብላ የሰጠችው የተረፋትን ነገር ሳይሆን ያላትን ነገር ሁሉ፣ ኑሮዋንም ሁሉ እንደሆነ አስታውሰዋል። ስለዚህም በእለቱ የመጨረሻ መሓላቸውን ያደረጉትን ሁለቱን ወጣቶች ራሳቸውን ለአምላክ በመስጠታቸው አመስግነው፣ እነሱንም ለእግዚአብሔር አገልግሎት ለቤተ ክርስቲያን የሰጡ ወላጆቻቸውንም አመስግነዋል።

በዕለቱ የተለያዩ ማኅበራት ደናግል እህቶች፣ ቁጥራቸው ብዙ የሆነ ምእመናን ተገኝተዋል። በመጨረሻም ገዳሙ ባዘጋጀው የምሳ ዝግጅት ላይ የተጋበዙ ሁሉ ተገኝተው፤ ዕለቱ ታላቅ የምስጋና ቀን ሆኖ ውሏል።

• Prev
• Next